I denne landsomfattande kunnskapstevlinga testar vi allmennkunnskapen vår. Kvart år vert det i tillegg valt eit eige tema som deltakarane kan førebu seg spesielt til gjennom eit eige studiemateriell. Gjennom tre tevlingsrundar svarar deltakarlaga på spørsmål som dei får tilsendt frå Noregs Ungdomslag. Det er allmenne kunnskapsspørsmål, der nokre er henta fra temaheftet.
Kven Veit? er ei nasjonal kunnskapstevling, eller quiz som vi med tida er vorte meir vand med å kalle det. Noregs Ungdomslag (NU) har arrangert tevlinga årleg sidan 1963. Vi lagar temahefte, spørsmål, svarark og skjema til 3 rundar med tevling. For kvar tevling får laga tildelt 10 kategoriar med tilsaman 30 spørsmål. Av desse er 6 spørsmål knytt til tema og ein kan altså lese seg opp på førehand.
Etter tre tevlingar vinn det laget som samanlagt har beste poengsum. Diplom og premie vert delt ut på NU sitt Landsmøte.
Alle kan delta, men spørsmåla er mest retta mot deltakarar frå 14 år og oppover
Kven Veit? senior er mest for deltakarar over 14 år.
Tevlingsleiaren skal gå gjennom reglane med deltakarane før spørjerundane tek til. Han/ho må og passe på at alle gruppene har nok kladdepapir. Kvar gruppe skal få utdelt svarsetlar og eit svarark. Dei skriv gruppenamn- og nummer på kvar setel og svarark. Tevlingsleiaren les spørsmåla i kategorien høgt. Gruppene får to minutt til å svare, om ikkje anna er nemnt på spørsmålsarket. Straks tida er ute, skal svarsetlane samlast inn og leverast dommarane. Deretter kan ein la gruppene svare munnleg på spørsmåla. Det er ikkje tillate å bruke hjelpemiddel i spørjerundane. Dersom ein ynskjer kan ein gjennomføre tevlinga ved at gruppene skriv svara rett på svararka og at ein leser opp svara når alle kategoriar er gjennomført.
Tevlingsleiaren avgjer om han/ho vil vente med å lese neste spørsmål til dommaren har kunngjort poengtala for svaret, men rutinane bør vere like gjennom heile tevlingsrunden. Når tevlingsrunden er gjennomført leverer kvar gruppe alle sine svar inn på eit svarark som samlar alle svara frå runda. Dommaren må sjekke at svararket stemmer med svarsetlane. Dommaren skal saman med tevlingsleiaren skrive under på dommarskjemaet og gå god for at tevlingsrunden er utført i samsvar med reglane.
Dommarskjema, svararket og svarsetlane frå kvar kategori frå alle gruppene skal sendast samla til Kven Veit-sekretariatet dagen etter kvar runde. Dette for å sjekke at svarsetlane, svarark og dommarskjema samsvarar. Dersom ein ynskjer kan svarsetlane, svarark og dommarskjema scannast og sendast på e-post til Ida@ungdomslag.no.
Evt. protestar skal vere skriftlege, og må sendast inn saman med svara. Resultat etter kvar tevlingsrunde vert presentert på www.ungdomslag.no. Det beste laget etter tre tevlingsrundar vert kåra som vinnar.
Deltakargruppene i Kven veit? kan melde tiltaket inn som opplæringstiltak til Studieforbundet kultur og tradisjon. Studieringen må vere samla i minst 8 timar, og kurset blir godkjent når minst tre av deltakarane over 14 år har 75 prosent frammøte. Alle deltakarane skal stå på frammøtelista. Godkjent studieplan må være med i søknaden.
Medlemspris 1-3 deltakarlag: 500 kroner per lag
Medlemspris 4 eller fleire deltakarlag: 350 kroner per lag
Pris ikkje-medlem 1-3 deltakarlag 600 kroner per lag
Pris ikkje-medlem 4 eller fleire deltakarlag: 450 kroner per lag
Pris Kven Veit? studiemateriell fysisk hefte: 100 kroner + porto
Årets vinnarar av Kven Veit? er kåra. Det var vore ein tett pallplassering heile vegen, der få få poeng har skilt laga frå kvarandre. Til slutt blei det tre lag som endte opp øvst på pallen.
26. april 2025
Årets vinnarar av kven veit er kåra. Tema for både quizzen og bildekonkurransen var eurovision. Sjå resultatlista ved å klikke her.
20. april 2024
Vinnaren av årets Kven Veit? er klar. Laget som vann har samanlagt 17 av 18 rette svar knytt til årets tema, noko som syner at dei har budd seg godt til tevlingane. I tillegg hadde dei alle rett i kategorien folkedans frå 2. runde og alle rett i kategorien Ivar Aasen frå 3. runde. Her har vi med andre ord eit lag som kjenner norskdomsrørsla si godt.
29. april 2023
Vi gratulerer Jentebølgen i Skodje Frilynde Ungdomslag med imponerande sluttspurt og siger i Kven Veit 2022. Laget starta litt forsiktig med 18 poeng i første runde, men auka til 26 i andre runde, og avslutta med krutsterke 29 poeng i sisterunden! Jentebølgen vann faktisk tevlinga med 3 poeng ned til neste lag, noko som er uvanleg mykje om ein ser på resultata dei siste åra.
23. april 2022
Årets vinnarlag av Kven veit? 2021 er kåra! Tevlinga har i år har vore prega av coronavirus, stadige utsetjingar og postvesen som ikkje har vore heilt velvillig. Tross dette har laga stått på og gjennomført tevlingane etter beste evne. Nokre lag har krydra tilværet til tevlingsleiaren med ris, ros og underfundige kommentarar. Det er noko vi set pris på og håper laga fortsett med!
16. oktober 2021