Årets FolkLeiarUng er i gong!
Denne helga går startskotet for årets FolkLeiarUng-prosjekt – ei satsing for unge folkemusikarar og folkedansarar mellom 15 og 25 år som vil lære meir om rolla som pedagog og leiar.
FolkLeiarUng er no inne i sitt femte år, og første samlingshelg finn stad på Voss 24.–26. oktober, i samband med Osafestivalen. Gjennom helga får deltakarane møte erfarne instruktørar, fordjupe seg i eiga sjanger og lære meir om formidling, samspel og pedagogiske metodar.
Osafestivalen
Den komande samlinga skjer under Osafestivalen på Voss. Festivalen har blitt arrangert sidan 1994, og er ein møtestad der folkemusikken møter andre, nærliggande musikkformer, til spanande, nye uttrykk. Ved å leggje første FolkLeiarUng-samling til denne festivalen, får deltakarane også moglegheit til å oppleve enda meir av både musikk og dans gjennom helga.
Her kan de lese meir om Osafestivalen
Om FolkLeiarUng
FolkLeiarUng er eit samarbeid mellom FolkOrg og Noregs Ungdomslag, og finansiert av Sparebankstiftelsen DNB og Dextra Musica. Her får unge musikarar og dansarar frå heile landet moglegheiten til å utvikle seg som framtidige pedagogar i spel- og danselag. Deltakarane får oppfølging gjennom året og møtest att til ny samling i Oslo 20.-22. mars. I år er det 18 deltakarar, fordelt på musikk og dans. Årets deltakarar kjem frå: Nes, Setesdal, Jevnaker, Røros, Oslo, Molde, Bergen, Osterøy, Trondheim, Bodø og Lom.
Prosjektet er meint å vere eit bidrag til lokallaga i form av å gi dei eldre ungdommane eit tilbod som kan auke motivasjonen til å halde fram med spelinga og dansinga i laget. Deltakarane får opplæring i korleis dei skal lære bort ein slått eller ein dans, kva som er viktig å ta omsyn til når ein skal planlegge øvingar, og korleis ein lærar bort til born og unge, kontra vaksne og erfarne.
Alle deltakarane får oppfølging av særs dyktige og kunnskapsrike instruktørar på dans og musikk: Anna Gjendem og Ina Maria Cyrus (dans) samt Vegar Vårdal og Kristoffer Kleiveland (musikk).
Vi ønsker årets deltakarar lukke til med dei komande samlingane, og vonar det blir ein spanande og lærarrik oppleving!
Om de veit om nokon på dykkar lag som kunne tenkje seg å vere deltakar på FolkLeiarUng, kjem det ein ny sjanse for skuleåret 2026/2027, så følg med.
Fleire aktueltsaker
Sjå alle
Kulturbyggstøtte gir firedobbel effekt
Sidan 2016 har Sparebankstiftinga Sogn og Fjordane og Huset i Bygda delt ut 15,3 millionar kroner til ungdomshus, grendahus og samfunnshus i fylket. Ein ny rapport viser at kvar krone har utløyst nesten fire kroner i lokal investering.
29. september 2026
Pressemelding: Levande møteplassar over heile landet
Arena for nabolagshus styrker samarbeidet mellom aktørane som arbeider for gode lokale møteplassar over heile landet. Noregs Ungdomslag og SoCentral får saman ansvar for den daglege drifta ut prosjektperioden, og det vil bli prøvd ut ein meir formalisert struktur for styringsgruppa. Arbeidet er gjort mogleg av ei ny tildeling på 4 millionar kroner frå Sparebankstiftelsen DNB, som skal nyttast til å vidareutvikle arenaen og mobilisere fleire samarbeidspartnarar og rammevilkårsetjarar. 22. september inviterer arenaen til sparringsverkstad under Kulturarenakonferansen i Oslo.
17. september 2026
Dans for born og ungdom på Ungdomshuset også i haust
Dans utan grenser Leikanger startar opp att med danseverkstad for born og ungdom på Leikanger ungdomshus 24. august 2026.
12. august 2026
