Bli med og snakk om bunad!
Denne hausten inviterer Noregs Ungdomslag og resten av samarbeidsorganiasjonane for bunad til UNESCO til regionale samtalemøte.

Desse møta er opne for alle som er interessert i å snakke om bunad og bunadbruk, og vi ønskjer å oppmode til sterk deltaking frå NU-lag i nærleiken av der møta finn stad.
Ein moglegheit for å påverke søknaden
Bunadbruken i Noreg er unik. Ein stor del av befolkninga eig og brukar bunad, og dei brukar den til høgtider. Variasjonen i bunadar er enorm, og det finst ei rekkje ulike materiale, mønster, teknikkar og historier knytt til bunad. Bunad vekker kjensler og engasjement, og har ein på seg bunad er det ofte ein samtalestartar. Samarbeidsorganisasjonane, som i tillegg til NU er Norges Husflidslag, Norsk Folkedraktforum, Norsk institutt for bunad og folkedrakt, og Studieforbundet kultur og tradisjon, ønskjer å setje søkjelys på den unike tradisjonen vi har for bunadbruk i Noreg. Ei innskriving på UNESCO si liste over immateriell kulturarv vil kunne føre med seg anerkjenning og status i tillegg til ei sikring av tradisjonskunnskapen om plagget og bruken.
Føremålet med samtalemøta er for prosjektet å samle inn refleksjonar og meiningar om bunad og bunadbruk. Alt innsamla materiale vil danne grunnlaget for innhaldet i søknaden til UNESCO. Det er viktig at vi får høyre kva bunadbrukarane meiner om bunad og bunadbruk, då søknaden skal vere folket sin søknad. Det er bunadbrukarane, eller kulturberarane, sine meiningar som skal vere bodskapet i søknaden. Du kan vere med på å påverke kva som står i søknaden gjennom å delta på dei regionale samtalemøta. For påmeldingsskjema og informasjon om kva tid og stad det er møte, sjå kalendaren til prosjektet her.:
Lokale møte
Viss du ikkje har høve til å delta på eit regionalt møte, så kan du eller laget ditt kanskje vere interessert i å invitere inn til eit lokalt møte om same tema? Kanskje de ønskjer å ha bunad som tema på ein lagskveld, eller kanskje styret vil ta føre seg spørsmåla om bunad og bunadbruk i eit styremøte? Det er fullt mogleg, og vi ønskjer at så mange som mogleg av våre lag inviterer til eit lokalt møte. Informasjon om korleis du gjennomfører eit lokalt møte, samt spørsmålshefte med spørsmål til diskusjon finn de på nettsidene til prosjektet her.
Ta kontakt med oss på post@bunadbruk.no viss du skulle ha spørsmål om møta eller nominasjonsprosjektet elles.

Fleire aktueltsaker
Sjå alle
Fyrets laiv 2026 - Glim
Kultur- og teaterverkstedet Fyret i Sandnessjøen arrangerte 11. oktober sin årlige laiv, denne gangen en fantasy-laiv om det tenkte landet Glim. Det var en firetimers laiv som foregikk i Vakkerdalen ved foten av fjellrekken De syv søstre. Det deltok rundt 90 elever og foreldre.
29. oktober 2026


Regjeringa kuttar nær éin million til Noregs Ungdomslag
Regjeringa har foreslått å redusere løyvinga til Noregs Ungdomslag med 905 000 kroner. Kuttet vil direkte påverke arbeidet med rådgjeving og kompetanseheving for tusenvis av frivillige som eig og driftar lokale kulturbygg over heile landet.
7. oktober 2026


Minnepris 2026 til ung hardingfeleutøvar frå Kvam
Audhild Flaktveit Moxnes sin minnepris til unge utøvarar på hardingfele 2026 er tildelt Guro Bell Berge frå Kvam i Hardanger.
6. oktober 2026


