Hopp til hovedinnhold
Reportasje

Magni Hjertenes Flyum blir ny generalsekretær i Noregs Ungdomslag

Flyum byrjar i stillinga som generalsekretær i Noregs Ungdomslag 1. juni i år, da åremålsstillinga til noverande generalsekretær Kai Roger Vatne går ut, og han har vald å ikkje forlenge åremålet.

Foto av Magni.

Flyum er busett i Nordfjordeid med mann og to vaksne barn, men skal i den nye stillinga pendle til og jobbe frå Oslo. Ho gler seg til å vere med å få i gang kulturaktiviteten rundt om i landet etter to år med korona-stillstand.

– Det blir veldig spennande å få lov å vere med i ein av dei viktigaste kulturorganisasjonane i Noreg når vi no skal "restarte" all kulturaktivitet over heile landet etter korona-tida, og fylle husa med aktivitet. Det å få lov å vere med på det, er veldig kjekt, seier Flyum til NU.

Engasjement for levande lokalkultur

I november i fjor starta styret i NU prosessen med å finne ny generalsekretær. Etter ein omfattande tilsetjingsprosess med fleire intervjurundar, fall valet på Flyum.

Leiar i NU, Torbjørn Bergwitz Lauen har stor tru på den nye generalsekretæren.

– Eg har veldig trua på at Magni blir ein god generalsekretær, og ser fram til å samarbeide med henne, seier Lauen.

– Ho har ein brei organisasjonsbakgrunn og kjenner til organisasjonen vår. Samtidig har ho òg eit utanifrå-blikk, noko som er ein fin kombinasjon, legg han til.

Lauen trekker òg fram at den nye generalsekretæren er engasjert i levande lokalkultur og viser engasjement for lokallaga.

Brei erfaring

Flyum har ein cand. scient. i fiskeribiologi frå Universitetet i Bergen, og har etterutdanning i styre- og strategiarbeid, næringsutvikling, bedriftsøkonomi og sosiale medium. Ho har hatt fleire jobbar innanfor kulturfeltet, og har dei seinare åra mellom anna jobba i Nynorsk kultursentrum, kulturnæringsselskapet Vakn og er i dag dagleg leiar i Norsk Fjordhestsenter.

I grunngivinga frå tilsetjingsutvalet heiter det mellom anna at Flyum kjenner Noregs Ungdomslag gjennom verv i nærskylde frivillige organisasjonar, at ho kjenner godt til språkarbeidet, og har følgd dei ulike organisasjonane knytt til Nynorsk forum tett gjennom ulike verv.

I dag sit ho i styret i Det Norske Teatret, og har tidlegare vore styreleiar i Norsk Barneblad. Ho har lang fartstid i Human-Etisk Forbund der ho no er fylkeslagsleiar, og ho har engasjert seg i fleire styreverv i kulturorganisasjonar og frivillige organisasjonar lokalt der ho bur.

Opptatt av fellesskapet

Den nye generalsekretæren gler seg aller mest ti å møte folk.

– Eg gler meg til å møte entusiastar som legg ned masse tid og arbeid for fellesskapet. Og det er utruleg ærbødig å få jobbe i ein av dei mest nasjonsbyggande organisasjonane i landet. NU var med å bygge samfunnet, og Noreg hadde ikkje sett sånn ut utan. Organisasjonen bygde demokrati, folkeopplysning og lokale samfunnshus. Det er ei ærerik historie å ha med seg, og vi skal halde fram med å bygge samfunnet, seier ho.

– Kva er viktigast når det gjeld å bygge samfunn i dag?

– Det er å ta vare på det frivillige og at lag og organisasjonar skal ha gode vilkår så dei kan lage meiningsfull fritid for alle.

– I koronatida har alt vore så stille og folk har vorte tvinga til å ta pause frå det dei har drive med til dagleg. No skal vi starte på ny. Da er det om å gjere at Noregs Ungdomslag kan bidra til å gjere det lettast mogleg for dei tillitsvalde å både setje i gang på ny med det dei har drive med før, og også å skape nye aktivitetar, seier Flyum.

Første høve til å møte den nye generalsekretæren får de i april – da skal ho vere med på landsmøtet. Velkommen til oss!

Foto av styreleiar Torbjørn Bergwitz Lauen.

Fleire aktueltsaker

Sjå alle
Lokallag

Fyrets laiv 2026 - Glim

Kultur- og teaterverkstedet Fyret i Sandnessjøen arrangerte 11. oktober sin årlige laiv, denne gangen en fantasy-laiv om det tenkte landet Glim. Det var en firetimers laiv som foregikk i Vakkerdalen ved foten av fjellrekken De syv søstre. Det deltok rundt 90 elever og foreldre.

29. oktober 2026

Biletet viser ein mann som står på ein stige og koplar til ledning i veggen. Det står ein anna mann framfor han og ser på kva han gjer.

Regjeringa kuttar nær éin million til Noregs Ungdomslag

Regjeringa har foreslått å redusere løyvinga til Noregs Ungdomslag med 905 000 kroner. Kuttet vil direkte påverke arbeidet med rådgjeving og kompetanseheving for tusenvis av frivillige som eig og driftar lokale kulturbygg over heile landet.

7. oktober 2026

Magni Hjertenes Flyum blir ny generalsekretær i Noregs Ungdomslag | Noregs Ungdomslag