No kjem regionale kulturfond

Regionale kulturfond er ei heilt ny tilskotsordning på regionalt nivå, og skal forvaltast av fylkeskommunane slik som den desentraliserte ordninga for kulturbygg. Tilskotet på til saman 75 millionar kroner, skal stimulere til auka aktivitet og deltaking i kulturlivet, styrke samspel mellom profesjonelt og frivillig kulturliv og bidra til høgare kvalitet på̊ kunst- og kulturtilbodet lokalt og regionalt.

Det er usikkert korleis ordninga vert utforma, og dette er også delvis opp til dei ulike fylka. Forskrift for regionale kulturfond kjem på høyring i haust.

Regjeringa legg også opp til full momskompensasjon i 2025. I 2023 fekk Noregs Ungdomslag sine lag til saman 7 249 633 kroner. I 2024 har ein søkt om 8 151 785 kr. Svar på denne søknaden kjem i desember. Straumstøtta for frivillige lag og organisasjonar vert også vidareført.

Vi gler oss også over at det er føreslått auke 1 million kroner til FolkOrg, øyremerka Landskappleiken og Landsfestivalen i gammaldansmusikk. For mange av våre lag, og resten av folkedans- og folkemusikkmiljøet er dette viktige arrangement.

For Noregs Ungdomslag er løyvinga for 2025 auka med 110 000 kroner til 3 070 000 kroner.