Tilskot til prosjekt Opne Dører
Noko av det viktigaste NU sentralt kan gjere er å drive eit kontinuerleg arbeid for å bli kjent med aktiviteten i og behova til våre eigne lokallag. No har vi gleda av å fortelje at vi har fått 140 588 kroner i midlar frå ei ekstra tilskotsrunde hos Frifond til å gjere nettopp dette.
Gjennom det tidsintensive prosjektet Opne Dører kjem styremedlemmar og tilsette i løpet av hausten 2025 til å reise ut for å møte lokallag og fylkeslag. Desse møta vil finne stad på regionalesamlingar, som sentralleddet i samarbeid med laga vil arrangere. Målet og ønsket er å treffe så mange av våre lag som mogleg og vi vil spreie samlingane breitt ut over.
Føremålet med dei regionale samlingane er først og fremst å dele erfaringar, bygge nettverk og skape grobotn for nye idear til aktivitet og arrangement lokalt. I tillegg vil ein nytte dei regionale samlingane til å spreie informasjon om NU og kva sentralleddet kan tilby til dei lokalt, samt bygge sjølvtillit og skape eigarskap til eigen organisasjon.
Samlingane skal vere lågterskel og attraktive for medlemmar med engasjement for lokallagsarbeid.Frifond-midlar støtter først og fremst opp om tiltak retta mot barn og ungdom, og vi håpar på stor deltaking frå yngre når vi etter kvart skal reise rundt.
Erfaringar frå tidlegare besøksrunder er at det er nyttig og lærerikt for både lag og sentralledd å møte kvarandre. Meir informasjon om samarbeid om og gjennomføring av samlingar vil kome etter kvart og vi håpar at mange lag vil melde si interesse.
Vi håpar at Opne Dører kan bidra til auka aktivitet og nye idear i våre lokallag. Vi takkar Frifond så mykje for tilskotet og ser fram til å kome oss ut på vegen.
Fleire aktueltsaker
Sjå alle
Kulturbyggstøtte gir firedobbel effekt
Sidan 2016 har Sparebankstiftinga Sogn og Fjordane og Huset i Bygda delt ut 15,3 millionar kroner til ungdomshus, grendahus og samfunnshus i fylket. Ein ny rapport viser at kvar krone har utløyst nesten fire kroner i lokal investering.
29. september 2026
Pressemelding: Levande møteplassar over heile landet
Arena for nabolagshus styrker samarbeidet mellom aktørane som arbeider for gode lokale møteplassar over heile landet. Noregs Ungdomslag og SoCentral får saman ansvar for den daglege drifta ut prosjektperioden, og det vil bli prøvd ut ein meir formalisert struktur for styringsgruppa. Arbeidet er gjort mogleg av ei ny tildeling på 4 millionar kroner frå Sparebankstiftelsen DNB, som skal nyttast til å vidareutvikle arenaen og mobilisere fleire samarbeidspartnarar og rammevilkårsetjarar. 22. september inviterer arenaen til sparringsverkstad under Kulturarenakonferansen i Oslo.
17. september 2026
Dans for born og ungdom på Ungdomshuset også i haust
Dans utan grenser Leikanger startar opp att med danseverkstad for born og ungdom på Leikanger ungdomshus 24. august 2026.
12. august 2026
