Over 9 millionar kroner på veg til lokallaga

7,6 av desse 9. millionanen er momskompensasjon for rekneskapsåret 2024 som nå fordelt vidare til lokallag som har søkt. I denne utbetalingsrunda har ikkje laga fått innvilga full momskompensasjon. Dette er fordi dette er ei ordning som er rammestyrt. Det betyr at Stortinget set ei øvre ramme for kor mykje pengar som skal bli delt ut totalt. Når den samla summen av godkjende søknadar er høgare enn budsjettramma, blir det gjort ei lik prosentvis avkorting for alle søkarar.

For 2024 er momskompensasjonen avkorta med om lag 8,2 prosent, og det er grunnen til at laga no ikkje får utbetalt heile det godkjende søknadsbeløpet Regjeringa har forsøkt å rette på dette ved å løyve 257 millionar ekstra til ordninga i budsjettsalderinga i Stortinget 22. desember. Dersom dette vert vedteke vil de få ei ekstra utbetaling i januar.

Noregs Ungdomslag arbeider kontinuerleg politisk for at momskompensasjonsordninga skal bli fullfinansiert, slik at frivillige lag og organisasjonar får dekka heile meirverdiavgifta dei har hatt utgifter til.

Her kan de sjå fordelinga av momskompensasjon for rekneskapsåret 2024 (pdf).

Les kva Frivillighet Norge skriv om årets momskompensasjonsutbetaling her.

Frifond gir eit ekstra løft til barne- og ungdomsaktivitet

I tillegg til momskompensasjonen blir også Frifond-midlar betalte ut i same periode. Frifond støttar aktivitet for barn og unge, og er eit viktig bidrag til levande lokallag og lågterskeltilbod i heile landet. Årets frifond-pott er på om lag 2 millionar kroner.

Samla sett gir desse utbetalingane eit solid økonomisk fundament for vidare aktivitet og frivillig engasjement i lokallaga.

Her kan du sjå årets Frifond-tildeling.

Les meir om Frifond her.