Fagseminar på Folkelarm: Innhaldslister i musikkfaget - korleis ta dei i bruk?

Korleis kan vi gjere det enklast mogleg for musikklærarar å ta i bruk eit større mangfald av musikktradisjonar i undervisninga? Og kva treng læraren av kunnskap, ressursar og praktiske verktøy for at ei innhaldsliste faktisk skal bli brukt?

Det er utarbeidd innhaldslister som skal bidra til større breidde og representasjon i musikkfaget. Men vegen frå ei liste over musikk, tradisjonar og uttrykk til faktisk undervisning i klasserommet kan vere lang. Skal listene fungere som gode verktøy, må dei vere tilgjengelege, relevante og enkle å omsetje til praksis – også for lærarar som ikkje allereie har spesialkompetanse på dei ulike musikktradisjonane.

Under årets Folkelarm inviterer vi derfor til eit praksisnært fagseminar om korleis innhaldslistene kan takast i bruk i musikkfaget.

Vi spør mellom anna:

• Kva meiner feltet om innhaldslistene slik dei ser ut i dag?
• Kva treng ein musikklærar for å kunne gå direkte frå innhaldslista til undervisning?
• Trengst det lyd- og filmeksempel, bakgrunnstekstar, undervisningsopplegg, notar, øvingar eller forslag til aktivitetar?
• Korleis kan ressursane organiserast slik at terskelen for å bruke dei blir så låg som mogleg?
• Korleis sikrar vi samstundes fagleg kvalitet og god representasjon av tradisjonane og miljøa materialet byggjer på?

Vi ønskjer å samle erfaringar og konkrete innspel frå lærarar, musikarar, tradisjonsberarar, forskarar og andre fagpersonar: Kva må på plass for at innhaldslistene skal bli eit verktøy som faktisk gjer det lettare å bruke folkemusikken og folkedansen som ein inkluderande arena i skulekvardagen?

Seminaret finn stad:

Fredag 20. november
Kl. 15.30 - 16.50
Intimscenen, Riksscena, Schous Kulturbryggeri Trondheimsveien 2T, Oslo

Arrangementet er eit samarbeid mellom FolkOrg, Noregs Ungdomslag og Norsk senter for folkemusikk og folkedans.