NORDRING 2026

2.-6. april 2026 arrangerast NORDRING - ei nordisk kulturutveksling for ungdom i alderen 18-25 år. Denne gongen er samlinga lokalisert i Skåne i Sverige.

Frå kvart av dei nordiske landa og sjølvstyrte område kan det delta 4 folkedansarar og 2 -musikarar.

Ungdomane har sjølv ansvar for å lære kvarandre tradisjonar innan dans, musikk, song, organisasjonskunnskap og påsketradisjonar frå sitt eige land/organisasjon til dei andre deltakarane. Det nordiske språket står også i fokus.

NORDRING vert halde kvart tredje år, så det er ei unik moglegheit å få delta på denne utvekslinga i 2026.

Førebels program

• Torsdag 2. april - Ankomst Hyllie ca kl. 15 - felles transport til Höllvikstrand Smörgåsfika
• Fredag 3. april - 2 timars kurs for musikarar og dansarar
• Laurdag 4. april - Utflukt til Foreviken
• Måndag 6. april - Avslutning og heimreise, ankomst Hyllie ca. kl. 11

NORDRING skjer i Skåne i Sverige, nærare bestemt: EFS Höllviksstrand, Höllvikstrandsvägen 2, 23638 Höllviken, Sverige

På NORDRING får du mellom anna:

• Kurs i spel og dans med instruktørar
• Kurs i spel, song og dans der deltakarane sjølv er instruktører
• Oppleve ulike påsketradisjonar, samt dele av din eigen tradisjon
• Utflukt til Foteviken
• Språkverkstad
• Informasjon og diskusjon om organisering av folkemusikk og folkedans i Norden og i dei ulike landa
• Møte andre ungdom i alderen 18-25 år som er like interessert i folkemusikk og folkedans som deg sjølv

Dette forventer vi av deg som deltakar under NORDRING:

• Du skal kunne formidle og undervise i folkedans/folkemusikk og/eller folkeviser frå Noreg og din tradisjon
• Du skal kunne fortelje om strukturen/organiseringa av din folkemusikk- og folkedansorganisasjon
• Du skal formidle påsketradisjoner frå Noreg og ditt lokalmiljø

Påmelding/søknad om å delta

Sidan det berre er plass til seks personar frå kvart land/sjølvstyrt område må du søke om å delta i prosjektet. Alle norske deltakarar søker direkte til oss i Noregs Ungdomslag.

Søknadsfrist: 1. desember 2025.

Send inn søknad via dette skjema: https://forms.office.com/e/uSxwrCFWSt

Etter søknadsfristen (før juleferie) vil du få svar på om du får plass eller ikkje.

Har du spørsmål kan du ta kontakt med oss på NU-kontoret.

Få ditt lokallag til å støtte deltakinga i NORDRING

Pris for å delta er 2500,- svenske kroner som dekkes av deltakaren sjølv. I tillegg kjem reisekostnader. Vi oppmoder sterkt lokallag og fylkeslag om å støtte deltakarar økonomisk for å reise - undersøk med ditt lokale lag om dei kan tenke seg å støtte deg.

• Følg også med på arrangøren si side for oppdateringar