Søk om å bli med på FolkLeiarUng

FolkLeiarUng er no inne i sitt femte prosjektår. Deltakarane får gjennom to helger i skuleåret inspirasjon og kunnskap om rolla som pedagog og danseleiar/musikalsk leiar. Målet med prosjektet er å gje unge folkedansarar og folkemusikarar ein møteplass der dei kan få kunnskap om og utvikle seg som pedagog og leiar. Deltakarane søker om å delta for eitt år om gongen.

Søknadsfristen for prosjektåret 2025/2026 er 28.august!

• Send inn søknad her

Kva inneber FolkLeiarUng for deg som deltakar?

Som deltakar i dette prosjektet vil du bli kjent med folkemusikarar og –dansarar frå alle kantar av landet. Du vil bli ein del av eit miljø for unge leiarar og pedagogar innan folkemusikk og folkedans, og ikkje minst får du oppfølging gjennom året av våre gode instruktørar. På samlingshelgene vil det vere fokus på fordjuping i eiga sjanger, formidling, erfaringsdeling, pedagogiske tips og triks, og samdans og samspel! Nokre døme på tema som deltakarane får lære meir om: Korleis lære bort ein slått eller dans? Kva er viktig å ta omsyn til når ein skal planlegge øvingar? Korleis lærer ein bort til born som er nybyrjarar, kontra vaksne som har spelt eller dansa lenge? Korleis leier du ein gjeng som spelar/dansar heilt ulikt og med ulike forkunnskapar? Korleis skapar du som pedagog eit trygt og inspirerande miljø?
Samlingane vil halde eit høgt nivå, der deltakarane får stor fridom til å utforske rolla som pedagog og leiar. Vi søker deltakarar som er nysgjerrige på å lære meir om rolla som leiar og pedagog, og som ønsker å ta med erfaringane frå dette prosjektet vidare inn i noverande og framtidige spel- og danselag.

Er du ikkje tilknytt eit særskild spelemannslag eller dansarlag? Kontakt FolkOrg eller Noregs Ungdomslag, så hjelper vi deg med å finne eit nærliggande lag.

Vi ønsker eit mangfald av instrument blant folkemusikkdeltakarane. Alt frå fele og hardingfele til toradar og trekkspel, langeleik, vokal, bass og gitar og så vidare.

Kva inneber FolkLeiarUng for laga?

Prosjektet er meint å vere eit bidrag til laga i form av å gi dei eldre ungdommane eit tilbod som kan auke motivasjonen til å halde fram med spelinga og dansinga i laga. Såleis er dette ein sjeldan sjanse for danse- og spelemannslag som ynskjer å gje dei eldste ungdommane sine eit inspirerande og utviklande tilbod.

Instruktørane og kontaktperson i FolkOrg/Noregs Ungdomslag kjem til å vere i kontakt med både deltakarane og laga i forkant av og mellom samlingane. På den måten blir laga informerte om kva deltakarane har jobba med, og korleis dei best kan følgje opp medlemmane sine fram til neste samling.

Deltakaravgift

Laga betaler 500 kr per deltakar frå sitt lag. Summen gjeld for heile skuleåret og inkluderer to kurshelger med overnatting og mat for deltakarane, samt oppfølging av laga og deltakarane mellom samlingane. Vi oppmodar også laga å dekke reiseutgifter til sine medlemmar.

Søknad

Deltakar som ynskjer å vere med fyller ut søknadsskjemaet nedst på denne sida. Søknaden gjeld for eit år om gongen og etterspør informasjon frå både deltakar og lag. Det er plass til opptil 20 deltakarar i prosjektet. Søkjarane vil få svar i laupet av september.
Deltakarar som har vore med på FolkLeiarUng tidlegare, får berre plass om det er ledige plassar på prosjektet.

Søknadsfrist: 28. august

Samlingshelgene blir 24. - 26. oktober på Voss under Osafestivalen, og 20. - 22. mars i Oslo. Alle som ynskjer å delta må sende inn søknad innan fristen via skjema på denne sida.

Samarbeid med FolkOrg

Vi i Noregs Ungdomslag (NU) er i lag med FolkOrg med som samarbeidspartnar på folkedans i prosjektet. Både FolkOrg og NU jobbar for å styrke og formidle folkedansen sin plass i samfunnet, og vonar dette prosjektet vil løfte fram unge folkedansspirer som vil utvikle seg som dansepedagog og -instruktør.

Kontakt

Har du spørsmål om prosjektet eller om søknaden? Ta kontakt med oss:

• Rita Sirirud Vatnehol, Noregs Ungdomslag: rita@ungdomslag.no/47849923
• Solveig Brekke Hauknes, Noregs Ungdomslag: solveig@ungdomslag.no/47398764
• Live Visdal, FolkOrg: live@folkorg.no/97415515