Inkluder dei organisasjonseigde kulturhusa

Noregs Ungdomslag oppmodar om forskottering av spelemidlar og reduserte kommunale avgifter for organisasjonseigde kulturhus

Noregs Ungdomslag oppmodar kommunane om at organisasjonseigde kulturhus vert inkludert i kommunale ordningar eller retningslinjer for forskottering av spelemidlar og får reduserte kommunale avgifter.

Noregs Ungdomslag (NU) er ein kulturorganisasjon med føremål om å skape engasjement og levande lokalmiljø gjennom folkelege kulturaktivitetar. Organisasjonen vart stifta i 1896, og vi har i dag om lag 14 000 medlemmar og vel 310 lokallag rundt om i heile landet.

NU er akkreditert som ikkje-statleg organisasjon i UNESCO sitt arbeid med immateriell kulturarv.

Gjennom Huset i Bygda (HiB) arbeidar NU for å løfte dei organisasjonseigde kulturhusa (ungdomshus, samfunnshus, bygdahus og bedehus) som viktige kulturarenaer, og utvikle møtestader og verktøy som kan gjere dei lokale laga til meir kompetente huseigarar. Mellom anna tilbyr vi kurs og rettleiing til og vi arrangerer hussamlingar og kulturhuskonferansar. Målsettinga er å skape framtidsretta bygg og at kvart enkelt kulturbygg skal bli synlegare og sterkare og få endå høgare status. Huset i Bygda har m.a. utvikla den einaste samla oversikten over organisasjonseigde kulturhus i Norge (Husdatabase).

Kulturhusa er midtpunkt i grender og bygdelag og er viktige arenaer for frivillig kulturarbeid og som sosiale møteplassar. På denne måten medverkar dei til auka bulyst i distrikta. Husa er òg viktige inkluderingsarenaer i eit stadig meir fleirkulturelt samfunn og fungerer som motvekt til sentralisering.

Vi om at kulturhusa vert inkludert i kommunale ordningar eller vedtekter for forskottering av spelemidlar. Det er viktig med likehandsaming mellom idrett og kulturfrivilligheita. I dag har mange kommunar har praksis for å støtte idrettslag med forskottering av spelemidlar. Dette må òg gjelde for organisasjonseigde kulturhus.

Sjølv om kulturhusa har ei viktig rolle i det lokale kulturlivet, er heller ikkje dei forskåna for auke i offentlege avgifter. Kommunane har òg varsla betydeleg auke i offentlege vatn og avlausgebyr i åra framover. Saman med auka straum- og forsikringskostnadar, trugar dette husa sin rolle og posisjon som lokale kulturarenaer. Jf. forureiningsforskrifta § 16-5 kan kommunane ha ulike gebyrsatsar. Vi vil med dette oppmode kommunen om reduserte kommunale avgifter for desse husa.

Noregs Ungdomslag meiner dette er ein meir treffsikker ordning enn å vere avhengig av kommunale stønadsordningar, der lag- og organisasjonar må kjempe om kommunale tilskotsmidlar. Dette vil vere eit viktig signal til lag og organisasjonar, samstundes som ein slik ordning vil treffe breitt og sikre likehandsaming mellom lag og organisasjonar i kommunen, som eig lokale kulturarenaer.

Last ned oppmodinga her.